Убакытты эмес, өзүбүздү туура башкаралы

Убакытты эмес, өзүбүздү туура башкаралы

Күнүмдүк-турмушта убакыттын жетишпегенин көп байкайбыз. Тагыраак айтканда, “Убакыт болбогондуктан жетишпей калдым” деген шылтоо менен жашайбыз.

Бирок ал жөн гана шылтоо экендигин аңдаганыбызда, “Убакытты туура башкаруу” маанилуу экендигин растайбыз.

Анан ал тууралуу ар кыл маалыматты карап, ылайыктуусун өз жашообузга пайдаланууга аракет кылабыз.

Тилекке каршы, андай аракеттен, көпчүлүк учурда, майнап чыкпайт. Себеби “баягы ичтеги көйгөйдү” дагы деле “сырттан” издеп жаткан болобуз.

Убакыт бул бизден көз карандысыз. Демек, анын бизге эч кандай тиешеси жок. Биз кааласак да, каалабасак да өтөт, кетет…

Андыктан биз убакытты башкаруунун ордуна, өзүбүздү башкарууну тандайбыз.

Ал учун, менин жашоомо пайда алып келген, туура адаттарды калыптандырууга умтулабыз.

Жеке өнүгүү, жеке тажрыйбадан.

@cholponkj

Балдарыбыз бактылуу болсун десек

Кайсы бир убакыттан бери, биздин жашообуздагы көп өксүктөр – өзүбүздү өзүбүз сыйлабагандыктан, түшүнбөгөндүктөн, жакшы көрбөгөндүктөн келип чыгаарын түшүндүм. Бул жан дүйнөдөгү боштук, “чыныгы өзүңдү” тааныбастык.

Бирок, эмнегедир, аны түшүнбөстөн бардык көйгөйдү сырттан издеп келебиз. Бул адам(үй-бүлө, тааныш, айырмасы жок) менен терс мамиле, жашоодогу ар кандай кыйынчылыктар.

Бул нерсе күндөн-күнгө, жылдан-жылга, керек болсо өмүр бою кайталанып келет.

Аны токтотуу учун, бир гана өзүңө суроо узатуу керек – “Менин жан дүйнөмдө азыр эмне болуп жатат?”. Бул суроого жооп жашоодогу дээрлик бардык көйгөйдү чечиши мүмкүн. Албетте, жүз пайыз жоопкерчиликти өзүңө алып, өзүң менен өзүң тынымсыз иштегенде.

Мисалы, көпчүлүк ата-энелер(айрыкча биз энелер) бир жакка барып келгенде үйдө калган балдар үй-ишин кылбай койсо, ачуу тилдегенибиз бар. Чынында, бул өтө деле чоң көйгөй эмес. Бала башка нерсеге алаксып, убагында кылбай калышы мүмкүн. Ага азыр деле кайра мүмкүндүк берүүгө болот.

Бирок эненин(атанын) ичиндеги өзүнө болгон нааразычылык(албетте, аны ал учурда аңдабайт) көбүрүп-жабырып, акыры балага чейин чачырайт. Аны менен балага моралдык зыян, өзүнүн жан дүйнөсүнө дагы бир жарат жаратат.

Бул эми күнүмдүк-турмуштагы эле кичинекей мисал. Ар бир адам өзүнө көңүл бөлө баштаганда, ичтеги өзүнө карата болгон терс сезимдер, жашоонун бардык жагына таасир этээрин байкайт.

Бирок, эң өкүнүчтүүсү, балдар чоңойгуча ата-эненин ошо терс энергиясына сугарылып, аны кайра оз жашоосунда кайталоого(көпчүлүк учурда) учурайт.

Андыктан, биз, ата-энелер, балдарыбыз өзүн сыйлаган, чыныгы бакытты сезген адамдардан болуп чоңоюсун кааласак, өзүбүздү түшүнгөн, сыйлаган адамдардан болуубуз зарыл.

*Албетте, бул бардык ата-энеге тийиштүү эмес.

*Бул баланын өткөөл курагында(айрыкча), бала менен муздак мамилени алдын алууда ойлонуучу маселе.

Жеке өнүгүү, жеке тажрыйбадан.

@cholponkj

Жан дүйнө бейпилдиги – жандан артык

Жан дүйнө бейпилдиги – жандан артык.

Жашоодо көп нерсени адатка айландырганбыз. Анын бири – жакын адамыбызга сарсанаа болуу.

Эмнегедир кимдир бирөөгө сарсанаа болуп, кыжаалат болсок, ал адамдын кыйынчылыгын же кайгысын тең бөлүшкөндөй.

Ооба, мунун бир аз чындыгы бар. Ал адам андан убактылуу колдоону сезип, баш көтөргөнгө аракет кылаар.

Бирок…

Сарсанаа болуп, кыжаалат болуубуз ал адамдын жашоосуна чынында эле керекпи?

Жеке өнүгүү боюнча ар кыл маалыматта “жан дүйнө тынчтыгынын” мааниси баса белгиленет. Себеби бизде болгон сезимдер: жаманбы-жакшыбы, эртеңки күнүбүздү чечет.

Андыктан жаман, же жакшы ойлонуубуз, ага карата болгон сезимдер, түздөн-түз биздин келечегибизге таасир этээрин эстейли.

Себеби жаман, же жакшы сезим бул оң, же терс энергия. Аны биз тандоого муктажбыз. Оң, же терс энергия – жакшы, же жаман жашоону өзүнө тартат.

Кошумчалай кете турган нерсе, мындай жагдайда мага жардам берген ыкманын бири – таң эрте туруп өзүмө жаккан иш менен алек болуу, таңдын атуусунда ыраазычылык жөнөтүү.

Ар бирибиздин мындай аракетибиз, сар-санаанын ордуна жакшы нерсеге көңул бөлүүгө, жакшы нерсени ойлонууга үйрөтөт.

Жеке өнүгүү, жеке тажрыйбадан.

@cholponkj

Таң эрте туруу – бизде жок убакытты жаратуу.

Таң эрте туруу – бизде жок убакытты жаратуу.

Жеке өнүгүү боюнча окууну угуп жатып “시간 창조자”(шиган чаңжожа), корей тилинен которгондо “убакыт жаратуучу” деген сөздү угуп калдым. Ал кезде таңкы убакытты өзүм үчүн толук кандуу пайдалана элек болгондуктан, “Туура! Эрте турсак бизде жок убакытты жаратабыз!” деген ой менен эле тим болдум.

Бирок эки жылга жакын убакыттан бери, эрте турууга аракет кылып, жеке өзүмө таңкы 2 саатты арноо менен “убакыт жаратуучу” сөзүнүн чыныгы маанисин эми-эми түшүнө баштадым.

Кунумдук турмушта мындай кептерди көп угабыз:

– Убакыт тез өтүп жатат.

– Бир жума бир заматта эле учуп кетти.

– Эчтекеге жетишпей калдым.

– Убакыт көз ачып жумгандай сыяктуу…

Кыскасы убакыттын тез өтүүсү, качан болбосун, баарыбызга нааразычылыкты жаратат.

Муну эми кеч туруп, же ирээтсиз кыймылдан улам убакытты ойдогудай пайдалана албагандыктан дейли. Ал эми жаратылышынан сергек, өмүр бою эрте турган адамдардын мындай оюна кандай карайбыз?

Ар бирибизде бирдей 24 саат бар. Бирок ошо убакыттын ичинде канча ишти аткарганыбыз, же аткаралбаганыбыз гана маанилуу болбостон, “ошо убакыттын ичинен канчасын өзүмө дагы жумшадым?”деген маанилуудөй.

Кептин төркүнү, убакыт жетишпейт деген шылтоо менен “чыныгы өзүбүз” менен байланышты үзүп алган жокпузбу?

Андай болсо, таңкы уйкуну жеңсек да, “убакыт жаратуучунун” ролунда “бизде жок убакытты” жаратууга аракет кылып көрөлү.

Жеке өнүгүү, жеке тажрыйбадан.

@cholponkj

Ийгилик – бул кыймыл.

Кыймыл – бул ийгилик, ийгилик – бул кыймыл.

Ийгилик чоң болобу, же кичине болобу, кыймылды талап кылат:)

Ошондуктан, эң оболу, өзүбүздү артка тарткан жаман адаттарды, же жан дүйнөбүзгө ыңгайсыздыкты жараткан жаман сапаттарды аныктообуз зарыл.

Андан кийин аларды тизмектеп кагазга түшүрүү. Себеби сөз менен эле айтып, өмүр бою сөз бойдон калган кыялдарыбыз көп.

Аларды аныктоо “өз жашообузга өзүбүз гана жооптуу” экендигибизди туюндурат. Анан ал тизмек бизди маал-маалы менен кайрылууга, тереңирээк ойлонууга түртөт. Ошону менен кийинки(негизги) кыймыл жаралат.

Мисалы, мен эки жылга жакын убакыттан бери, эрте туруп басууну адатка айландырдым. Эрте туруп басуу менен гана алек болбостон, жеке өнүгүүгө арналган окууну да максат кылдым.

Бул кыймыл-аракет, “жашоомду артка тарткан жаман адаттан арылайын” деген чечимден кийин башталган.

Албетте, мындай ой пайда болгондо эле дароо өзгөрө баштаганым жок. Көп жылдар бою план түзүп, туура ойлонууга, шыктандыруучу маалыматты угууга аракет кылдым.

Бирок, эмнегедир, канча аракет кылбайын жарытаарлык жыйынтык болбоду. Себеби сөз менен айтып, кагазга жазып, кыймылдоого келгенде “аны билемге” салып койчу элем.

Ошондуктан бүгүнкү блог, баягында мендей болуп, билем деп кыймылга ашыкпаган досторго арналат. Ийгилик кыймылдан башталат, достор, көңүлгө алабыз!

Жеке өнүгүү, жеке тажрыйбадан.

@cholponkj

Биз – магнитпиз

Биз – магнитпиз

Жашообузда болгон бардык көрүнүштүн жакшысын да, жаманын да өзүбүзгө өзүбүз тартып турабыз. Эгер сүрөттөн байкасаңар, жолдун жээгинен китеп таап алдым.

“Анын эмнеси бар экен? Бирөө көчөгө китепти түшүрүп салса, аны деле таап алышыбыз мүмкүн.” – дээрбиз.

Бирок…

Бир жылдан бери, ушу китептин автору(김미경/Ким Мигёң) түзгөн Интернет окуу жайында(МКYU) окуп жүрөм. Бул мугалим эженин ‘жеке өнүгүү’, ‘бала менен туура мамиле түзүү’ сыяктуу кеңештерине көптөн бери кызыгам. Ошондуктан эртең мененки басууга чейинки бир саатты, анын окууларына арноого аракет кылам.

Баарынан кызыгы, ошо окууну угуп бүтүп, эртең мененки басуудан кайтып келе жатканда, “Эненин өзүн-өзү сыйлоо окуусу” аттуу китебине туш келип калгандыгымда.

Бул окуяга кандай карайсыздар?

“Мен дагы магнит болдум” деген, ушу сыяктуу, окуяларды көп эле байкап жүрсөңүздөр керек.

Өз жашообузду өзүбүз түзөөрүбүзгө, эч деле жаңылык болбой калды го. Бул дагы закон ченемдүү көрүнүш болгондуктан, тереңирээк көңүл бөлүп, өзүбүзгө жаккан нерселерге магнит болууну максат кылсак, кандай дейсиздер?

ЧолпонК

Таң…

Ар бир адамдын кемчилиги(жаман адат, же сапат) бар. Ал кемчиликти аңдоо жеке өнүгүүгө багыт берет, же өзүн-өзү жемелөөгө алып келет

Мисалы, менин кемчилигимдин бири – кеч туруу адаты. Аны оңдоо учун, таңды тосуп өзүм менен иштөө аракетиндемин.

Ал эми сиздерчи? Кайсы кемчилигиңизди, кандай жол менен оңдоо аракетиндесиз?

Бул, жөн эле, жеке өнүгүүгө багыт бере турган суроо.

Ар бирибиз өзүбүзгө суроо узатып, оңолууга, өзгөрүүгө умтулсак, жашообузга бир далай жакшылыктар өзү эле кирип келет.

ЧолпонК

Ар бир таңды ыраазычылык менен тосолу

Ар бир таңды ыраазычылык менен тосолу~

Таң заарда күн чыгышты багыттай, чын жүрөктөн ыраазычылык жөнөтсөк, өзгөчө сезимдин пайда болуусун байкоого болот.

Ал сезим бизди, кудум эле телефонду заряддагандай, күчтүү энергия менен камсыз кылат.

Бул үчүн айрым бир(өзүбүзгө жаккан) “аффирмацияларды” ичибизден кайталап, анын чыныгы күчүн сезүүгө аракет кылуу керек.

Мисалы, мага “Ыраазымын” сөзүнүн өзү эле, о.э. “Менин жана жакындарымдын жашоосундагы бардык жакшылыктарга ыраазымын” сыяктуу аффирмациялар өзгөчө таасир берет. Ошондуктан аларды эртең мененки басууда күнүгө кайталоого аракет кылам.

Себеби андан алган энергия ойду туура нукка буруп, жашообуздун туура багыт алуусуна өбөлгө түзөт.

ЧолпонК

Корообузга чек койгондой, оюбузга да чек коюп алып жүрбөйлү

Корообузга чек койгондой, оюбузга(аң-сезимибизге) да чек коюп алып жүрбөйлү…

Ар бир адамдын эңсеген кыялы бар. Аны орундатуу да, ал адамдын өз колунда.

Ал үчүн “оюндагы чектөөнү” аңдай билүүсү зарыл. Бул аң-сезимдеги каалоо менен чектөөнү ак-карадай ажыратканга барабар.

Мындай аракет адамдын өзүнө болгон көз карашын өзгөртөт. Буга чейин “Мен үчүн мүмкүн эмес” деген нерсе мүмкүн болуп, же “Колуман келбейт” деген нерсе колунан келе баштайт. Себеби ойду өзгөртүү жаңы кадамга барууга түртүп, кыялын орундатууга алып келет.

Бул үчүн чечкиндүүлүк, ишти сөз менен эмес, кыймыл менен баштоо талап кылынат!

ЧолпонК

#кыргызчаблог #кыргызчамотивация

*Сүрөттө Түштүк Корея(02.03.2021.)

Жашоону өзгөрткөн китеп окуу!

Бул жолку блог китеп окуш керек эле деп, бирок китепти ачканда эле уйкусу келген, же ар кандай шылтоо менен китепти жапканга шашкан замандаштарга арналат!

Ошондой эле китеп окуу менен өзгөрүүгө, өнүгүүгө умтулган замандаштарга арналат!

Бул видео блог, аз да болсо, жеке өнүгүүбүзгө салымын кошоор деген тилекте, ЧолпонК.

*Каналга катталып, пикир калтыруу үчүн – Ютуб “CholponKJ”…